شھید جنرل قاسم سلیمانی اور شھید ابو مہدی المہندس کے خون کا انتقام ضرور لیا جائے گا۔یہ بات ایران کی عدلیہ کے سربراہ آیت اللہ ابراھیم رئیسی نے عراق کے دارالحکومت بغداد پہونچنے پر کہی۔
تسنیم نیوز کے مطابق آیت اللہ رئیسی پیر کی شب اپنے تین روزہ دورے پر بغداد پہونچے جہاں عراقی عوام نے ان کا زبردست استقبال کیا۔ اپنے سفر کے آغاز پر آیت اللہ رئیسی ایران کی قدس فورس کے کمانڈر جنرل قاسم سلیمانی اور عراق کی رضاکار فورس الحشد الشعبی کے ڈپٹی کمانڈر جنرل ابو مہدی المہندس کی جائے شہادت پر حاضر ہوئے اور ان دو شھیدوں کو خراج عقیدت پیش کیا۔ اس مقام پر بھی عراقی عوام کی بڑی تعداد ان کے ہمراہ موجود تھی۔
اس موقع پر ایران کی عدلیہ کے سربراہ نے کہا کہ یہ وہ مقام ہے جہاں ایرانی اور عراقی خون ایک ساتھ مل کر بہا ہے اور یہ وہ جگہ ہے جو امریکی جرائم اور بین الاقوامی قوانین سے گریزاں اس کی حقیقت و ماہیت کی علامت بن چکی ہے۔
انھوں نے شھید قاسم سلیمانی اور شھید ابو مہدی المہندس کو صرف ایران و عراق ہی سے نہیں بلکہ پورے امت اسلامیہ اور بشریت سے متعلق قرار دیا اور کہا کہ خدا کا دستِ انتقام اسی امت کے درمیان سے بلند ہو چکا ہے اور ان شہدا کے خون کا انتقام ضرور لیا جائے گا۔
ایران کے چیف جسٹس نے امریکہ کی جانب سے داعش کی ہونے والی مسلسل حمایت کا ذکر کرتے ہوئے کہا کہ خود امریکہ نے اسے وجود بخشا اور اس کے بعد اب ہر قسم کی مالی، اسلحہ جاتی اور اطلاعاتی مدد کر کے اسے مسلم اقوام کے خلاف جرائم کی انجام دہی کے لئے سرگرم کئے ہوئے ہے اور جو بھی داعش کے مقابلے کے لئے کھڑا ہوتا امریکہ اسے نشانہ بناتا ہے۔
خیال رہے کہ ایران کی عدلیہ کے سربراہ عراقی عدلیہ کی اعلیٰ کونسل کے سربراہ فائق زیدان کی دعوت پر عراق پہونچے ہیں اور وہ اپنے اس تین روزہ سفر کے دوران صدر برہم صالح، وزیر اعظم مصطفیٰ الکاظمی اور پارلیمنٹ اسپیکر محمد الحلبوسی سے بھی ملاقات کریں گے۔
قابل ذکر ہے کہ جنرل قاسم سلیمانی اور ابو مہدی المہندس کی شہادت کا معاملہ بغداد میں ہونے والے مذاکرات کے اہم ترین مسائل میں شامل ہے۔

Add comment